場內部份空調股創出歷史新高，志高（449）歷史高位喺2011年頭1蚊，現價（0.222元）大插水近80%，殘到爆之餘，基本面亦唔削。買志高，博爆邊。
去年下半年，阿爺頒佈家電能效新標準，空調能效限定值（the minimum allowable values）由以往3.0，提升到3.9，唔少高能消耗嘅產品被淘汰。但志高空調自家研發空調，最高季節能效，已經高達8.6，遠遠超過新標準，技術、節能層面，贏晒。
更重要係，阿爺非常注重環保，志高空調產品，食住環保國策，有運行。而單係上年頭三季，集團全資附屬「廣東志高」純利，就挨近1.8億銀人仔，比2012年度同期，增長20%。阿仔有省鏡業績，志高全年度業績，已經坐定粒六。
再講，隨着城鎮化，城市興建所釋出產業規模，高達3萬億銀人仔，家調行業包括志高在內，肯定分一杯羮。啱啱上年半年度，志高海外市場銷售額，高達29億銀人仔，已經追到在祖國銷售額。祖國城鎮化及海外復蘇兩瓣，志高增長，今年開始爆炸。
PE平同行近半
係咁易估志高2013年度EPS增長20%，今年EPS，再翻半番到2.5仙，預測PE得8.8倍，場內同行預測PE 14倍至18倍不等，志高平成半。
志高PB得0.5倍，場內科龍（921）一年累升咗2.3倍，海爾（1169）升咗60%，PB高達6.7倍及7.2倍。另一家威靈（382），上年10月發力，一年大升88%，PB亦挨近2倍，相比之下，志高PB最吸引。
志高呢期已經貼實一年嘅長方形頂，等爆邊，博翻一番到0.44元，預測PE先啱啱貼近同行，但PB未有耐追到行家。
錢雋
細價股專家
本欄逢周二、五刊出