到南華大廈嘅會所吃午飯，排隊入𨋢，咁啱前面嗰位先生就係投資L，再前一位就係陳黃穗，於是大家互相恭喜發財，身壯力健。投資L話：「左生你發晒得嘅嘞，我要更多身壯力健。」佢梗係身壯力健啦，身材十分標準，全無肥肚腩，中年人之中罕見也。投資L話啱啱從北海道滑雪回來，東京有大雪暴，航班取消之時，北海道陽光普照，雪地風光不知幾好，坐直航機回港毫無阻滯，相形之下，去東京放假之朋友就辛苦咯。投資L奇怪為何北海道在北方冇雪暴，反為東京落個不停，天氣實在反常。
我地唔係科學家，難以解釋或明白。天真許就不時打電話嚟關心左丁山是否買咗股票，叫左丁山切不可入市，尤其是不可高追銀河娛樂呢隻賭股。問佢點解，佢有兩個解釋，一個係波浪理論走勢圖，另一個係今年太陽黑子大量減少，美國網站有不少文章觀察到呢一點，佢話太陽黑子減少時期，地球氣候變冷甚至進入小冰河時期，北半球在冬天降大雪，屢有風暴，直接打擊經濟活動，例如交通受阻，工人不能上班，主婦不能出外購物，導致零售業增長放緩等等，稍遲就會反映在上市公司業績上，令股價受壓，如果間間大公司如此，整體股市當然會向下走。
天真許如此說，左丁山只能半信半疑，不過佢一個星期兩次來電，囑咐左丁山唔好入市，都要多謝佢一片苦心、好心。呢位先生經常逆向思維，與主流意見對着幹，算佢有勇氣。
投資L就叫我地少沾地產股為妙，原因不是辣招辣到地產商飆眼淚，而是在大環境之下，香港地產發展已逼近飽和狀態，高速增長機會不再，況且建築費不斷上升，在某些區域建築費高過地價，實在令發展商難計數。北上又如何？投資L話更加唔駛睇，內房公司已經壯大，財力更勝港商，人地夠勇有門路，香港發展商上到去，絕無優勢，常處下風，現在香港商人開始明白祖國「地大勿博」，既然咁講，炒股只有炒網股、賭股、醫藥股之類，夠膽就博，冇膽就縮。