上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：邊個係英軍奇兵。
睇英超，焦點當然落喺傳統強隊身上，有時連英格蘭領隊都好自然留意強隊球員多啲，但喺中下游，其實仲有唔少好球員，例如新特蘭嘅阿當莊臣。
阿當莊臣喺米杜士堡出道，到2010年轉投曼城。喺呢支豪門大會入面，阿當莊臣自然唔夠人爭正選，但每次落場都交足功課，同埋睇得出佢不斷有進步。2011/12球季，係佢離開曼城前嘅一季，阿當莊臣只係得嗰10次聯賽正選，16次後備，但都攞到6個入波，入球率真係唔錯。當然，同大衛施華嗰種級數拍埋比，咁就梗係冇得比啦！但對於𠵱家人才斷層嘅英格蘭國家隊嚟講，阿當莊臣都係個好好用嘅球員。
上季，阿當莊臣去咗新特蘭，交出5入球6助攻嘅成績表，今季踢咗半季多啲，已經入咗7球，另外有3次助攻，表現繼續有進步。睇今季英超，阿當莊臣係入球數一數二多嘅英格蘭翼鋒，只叫做少過積洛迪古斯，同拉爾拉拿平排。
鶴臣好鍾意用熱刺嘅安祖斯唐辛，貪佢識推大位遠射，而26歲嘅阿當莊臣就正正係一個加強版嘅唐辛。佢一出道就靠推大位遠射呢招揚名，用咗好幾年，踢法越嚟越成熟，掌握射門時機嘅能力亦比唐辛好。二來，阿當莊臣近兩季都好少傷。如果鶴臣真係要揀隻識遠射嘅翼，阿當莊臣會係最佳選擇，至少肯定好過曼聯嘅艾舒利楊格。
文：咖喱