淡出學民嘅張秀賢上周喺《明報》寫文，無啦啦俾人加編按，註明文中引述《明報》未來首席執總鍾天祥會整頓星期日明報嘅傳聞係「無中生有」。《明報》老總張健波向張秀賢承認，個編按的確出自佢本人手筆，原因係避免「以訛傳訛」喎。
張秀賢噚日份聲明附帶張健波嘅回覆，張波喺電郵話鍾天祥整頓星期日明報「不是事實」，編輯又聯絡唔到佢，「在兼顧稿件照登同時避免以訛傳訛的情況下，我親自撰寫編者按」。張秀賢就覺得，個傳聞係《蘋果》報道出嚟，有根有據，《明報》應該喺報道出街之後自己發聲明澄清，𠵱家利用佢個專欄澄清，係損害佢嘅聲譽。佢希望張波公開澄清佢並唔係無中生有，修補佢同編輯之間嘅互信。