由金秀賢與全智賢主演的韓劇《來自星星的你》近期在本土和中台都爆紅起來，想不到連香港的大忙人古天樂、鄭秀文、楊千嬅、楊穎（AngelaBaby）和周麗淇最近一樣加入追「星」族，到底他們為何也會迷上呢？
楊千嬅發現老公丁子高追看《星星》而跟着看，結果欲罷不能，她說：「呢齣劇拍攝手法好有電影感，剪接又好，娛樂性好豐富，入面仲要加條懸疑線落去，又有愛情線發展，編、導、演都應記一功，男女主角同配角都好立體，大家都有戲做，真係好少戲連啲配角都好睇。」
高富帥＋超能力
古天樂都讚賞韓劇水準越來越高表示：「首先編劇設定男主角係外星人，有超能力，然後遇上超紅嘅女明星，而呢位女明星原來前幾世都同佢有淵源，個題材本身已經好睇，再加上全智賢做得好鬼搞笑，佢係呢齣劇嘅靈魂，睇佢演飲醉酒嗰場戲，佢真係完全放低身段，演得好放、好精采，真係畀佢笑死。而男主角高大帥氣，學識淵博，對愛情又專一，有錢有超能力，咁嘅角色設定，女粉絲點會唔迷死。」
鄭秀文甚少追韓劇，最近她也被《星星》吸引，她表示：「朋友推介之下，睇咗一啲，男主角古代人身份的設定好聰明，呈現出嘅時代衝突，令角色好有趣。女主角嘅演出好似萬花筒，非常豐富好多層次同色彩，充滿各式情感。戲中每位演員的角色都很鮮明，有發揮，互動有火花。讚！」
周麗淇最近也中了星星毒，她表示：「我以前冇追韓劇，但好多朋友叫我睇《星星》，全智賢本身已吸引我，再加上個題材幾新鮮，節奏又明快，靚人靚景，男女主角襯到絕。」
AngelaBaby與新男神金秀賢合作拍攝過廣告，她表示：「初時純粹是諗住捧吓場，冇諗到咁好睇，估唔到金秀賢戲咁好，個劇係值得觀眾捧場，難怪咁鬼受歡迎。」
採訪：鍾國仁