雖然俗語有云「男人唔壞，女人唔愛」，但好男人又點會冇人愛？若論女粉絲尖叫聲分貝，長谷部誠一定唔夠一班東瀛國腳「揮」，但呢位日本國家隊隊長憑住沉穩同木獨嘅性格，一樣吸引到唔少女球迷。
效力紐倫堡嘅長谷部誠早前右膝受傷，前陣子（1月18號）係佢30歲生日，但因為接受膝部手術，要喺病床度過大日子。雖然長谷部誠貴為國家隊隊長，但其「擔屎唔偷食」嘅老實性格，不時成為同輩甚至後輩上節目時嘅取笑對象，同時都證明呢個日本隊長人緣極好，必定成日收「好人卡」，所以到𠵱家都仲係孤家寡人。儘管生日要卧病在床，但佢都收到唔少禮物同問候，其親切性格連幼稚園小朋友都畫卡慰問。佢雖然唔係㗎妹情人節送朱古力嘅no.1對象，不過仍大受日本國民喜愛。
長谷部誠樣子平平，花邊新聞又唔多，木木獨獨的確毫不起眼，做理想情人有咩好？我哋體育版有人話長谷部誠貌似宇宙最強甄子丹，除咗樣似，相信同樣係好老公好爸爸嘅人選。文：呂晨