廠商會今年大事除咗有連串80周年慶典活動，當然仲有年底嘅領導層改選啦！未來會長大熱人選之一嘅現任副會長顏吳餘英，噚日同傳媒春茗活動時，雖然未直接表明心迹，但都叫大家多多支持。
嘩，提早搶閘拉票，可見戰意高昂，誠意十足，唔知另一位盛傳有意去馬嘅副會長李秀恒，有乜嘢絕招迎戰？
至於現屆會長施榮懷，卸任前除咗要搞好廠商會80周年慶典，包括4月中嘅大型晚宴外，亦要喺5月初帶團訪京，八方聽聞佢哋暫定行程約三日，最後都要睇北京有乜嘢安排。咦，5月初咁啱係政改諮詢完結喎，唔知屆時接見廠商會訪京團嘅北京領導，會唔會趁機放吓話呢？