合共八場的「徐小鳳演唱會2014」前晚假紅館開騷，小鳳姐先後換五套衫，當中四套是同款的魚尾裙，突出小鳳姐招牌纖腰，而經典波點裙則以魚尾剪裁呈現在安哥環節。
頭場特別嘉賓鄭秀文（Sammi），穿金裝及波點鞋配合小鳳姐特徵，合唱《隨想曲》後，小鳳姐說：「你叫秀文，我係肥鳳。」Sammi說：「邊度係呢，你係弗鳳，條腰仲幼過我，我今日闊闊哋，好彩睇唔到我條腰。」為答謝Sammi，小鳳姐除下手上一對金戒指為Sammi邊戴邊說：「呢一隻幫你戴，祝願你永遠幸福愉快，呢一隻請你轉送畀佢。」Sammi儍笑說：「講呢啲，小鳳姐。」小鳳姐續說：「大家唔好誤會，呢個佢係只要邊個畀到Sammi幸福愉快健康嘅話，咁你就轉送畀佢，咁就叫做『佢先生』。」Sammi哈哈大笑說：「小鳳姐真係唔夠你嚟。」
挑戰舞王快歌
小鳳姐被男觀眾吹口哨時，她說：「成日有人調戲我，已經慣。」被讚靚女時，她自嘲：「上台就整整齊齊，去超市就唔點理個樣。」她又跟久未露面的盧冠廷合唱《舊夢何處尋》，尾段以山歌唱法演繹《天鳥》，亦首次獻唱英文歌，盧冠廷說：「小鳳姐兩日時間就識唱。」她又公開《Love Me Tender》中譯版「納米聽打」讓觀眾試唱。尾段小鳳姐演繹多位歌手串燒快歌，更大跳郭富城《唱這歌》舞步，但只限手部揮動，她笑說：「原來城城啲歌好難唱。」最後她穿波點裙獻唱《喜氣洋洋》作結。
昨有傳Sammi懷孕兩個月兼復活節結婚，找成龍、劉德華、舒淇及梁詠琪任伴郎伴娘，Sammi經理人昨向本報否認：「佢拍緊戲，噚晚（前晚）仲着高踭鞋任小鳳姐嘉賓，未聽過結婚計劃。」
採訪：馬建華
