網民早前喺廣東道嘅「驅蝗行動」，除咗驚動特區政府話要嚴懲，仲辣㷫中央啟動左報向反蝗人士開拖，甚至連建議調整內地訪港人數都唔畀，有此提議嘅新民黨田北辰噚日慘被官媒《環球時報》發社論，批評佢呢個建議好自私。堂堂港區人大代表俾自己人轟？田二少打去《環時》問究竟，佢話一切都係誤會所致喎。
《環時》噚日發表題為《規定內地訪香港人數，好自私的動議》社評，一開波就引述田北辰話會向內地提交議案，建議調控內地來港旅客數量增長設定喺每年3%至5%，其後就連珠發炮，話為自由行設限聽上去有道理，卻會惹來內地人反感，強調自由行係中央喺香港經濟不景時送上嘅大禮，帶動經濟就業，鬧港人「不能把內地遊客當成沒有尊嚴的搖錢樹，想讓他們來多少，中央就通過調控準確放進來多少」。
騰訊：互惠交易當施恩
以為咁就完？財大氣粗嘅強國人點會夠喉？《環時》直指二少嘅建議「是以自我為中心的幻想」，話香港如果仲想內地客來港振興經濟，就要豁達啲囉，暗示二少唔應該咁小器喎。
港區人大代表都被插？二少唔緊張就假。佢噚日即時同《環時》人員聯絡，引述對方聽完佢提議都覺得有道理。二少話《環時》咁寫，因為佢哋只基於傳媒報道作評論，唔知道佢出發點，相信有誤解，重申佢嘅提議兼顧內地客感受，即係基建配套若然未追上就限自由行增幅，咁先係雙贏。
而大陸網騰訊日前刊出一篇題為《大陸人的恩主心態從何來》嘅評論文章，以香港「驅蝗行動」示威為切入點，話唔少內地客將互惠互利嘅交易，睇成對其他地區嘅「施恩」，文章喺網瘋傳後，騰訊竟然河蟹刪文，好彩有網民一早cap文留歷史見證。
李八方
mailto:[email protected]