韓流襲港，《來自星星的你》近排熱爆，筆者唔少朋友都有追，劇集已接近尾聲，都敏俊最終會否放棄400年一遇嘅機會返回外星家鄉，定跟千頌伊大團圓結局，未到最後一集都唔知道。不過，飾演外星人嘅都敏俊嘅金秀賢同飾演人氣女星千頌伊嘅全智賢就人氣急升，成為廣告商爭相羅致嘅目標，學賭王何鴻燊話齋，肥到襪都着唔到。
創意產業受滙率影響微
事實上，近年韓風吹襲亞洲氣勢強勁，演藝界繼早年有《大長今》，近年先後有Wonder Girls、PSY、少女時代、《Running Man》等紅遍中港台；電子產品有Samsung實力直逼蘋果；護膚品有Laneige、雪花秀、innisfree令女士乖乖打開荷包；韓國簡直全方位吸收外滙，為南韓經濟寫上新的一頁。
值得注視嘅係，南韓作為科技產品出口大國，區內最大對手係日本，日本首相安倍晉三2012年底上場後大手推動經濟改革，主要靠日圓貶值食糊，其中韓圜兌美元至今已累跌近兩成，南韓出口產品首當其衝，令當地廠商叫苦連天。話雖如此，南韓近期經濟仍較日本硬淨，上季經濟錄得有3.9%，凸顯兩國競爭力嘅此消彼長。唔多唔少亦反映，創意產業較能承受滙率因素呢啲局限。
南韓過去十多年唔單止科技產業發展迅速，自千禧年代開始，其文化產業在亞洲市場亦大有瞄頭，再將日本這個前輩殺下馬。九十年代初，日本拍攝嘅《東京愛的故事》、《悠長假期》風靡萬千亞洲劇迷，如今則由《來自星星的你》等韓劇獨領風騷；講科技，九十年代Sony嘅科技產品、任天堂遊戲機等產品傲視全球市場，但近期就節節敗退，Sony早前出售個人電腦業務便是最新例證。
內地數據差 日圓受捧
講番滙市，滙豐昨日公佈2月內地PMI初值降到48.3，再創八個月低位，令市場對內地經濟前景轉趨悲觀，加上烏克蘭政局動盪，引發資金避險，日圓噚日兌各主要貨幣全線造好。澳元因與內地經濟息息相關，自然亦首當其衝，噚日失守90美仙，落番89.38美仙。英鎊上周創四年新高後似乎要抖氣，昨日喺1.66美元水平上落，部份原因相信同失業率反彈0.1個百分點有關。歐元先升後跌，主因2月PMI數據麻麻，製造業及服務業分類指數分別報51.7及52.7，較預期差，噚日早段升到1.3762美元後掉頭向下。
聯儲局周三公佈1月會議紀錄，顯示理事對幾時加息嘅立場有爭論，有人提倡年中開始加息，但遭大多數人反對，亦有理事建議修改失業指數門檻，意味3月耶倫首次主持議息會議時，會有新嘢出。在此之前，美元估計仍屬上落市，日本央行周二出乎意料擴大銀行借貸計劃，協助企業融資，市場憧憬短期有後着，雖對日圓後市不利，但受制於市場風險胃納下降，短期繼續在101至103上落。
奇兵
本欄逢周五刊登