騰訊（700）和阿里對決，讀者如Samantha對呢系列新聞已開始感倦怠，事關每日最少一單刁，各類收購已變成天氣報告，由call的士手機應用程式、理財產品以至網上藥店，身為股民心思只是想：哪隻細股可得到兩位巨頭寵幸，最好好似隻中信21（241）咁搞藥店翻幾番，近排藥股都蠢蠢欲動，當中可吼於東北地區領先的醫藥零售及分銷商的金天醫藥（2211）。
近排冷空氣來襲，最南面的香港人很多都捱唔住涷，慘變藥煲，而被稱為「中國北極」的黑龍江漠河縣，早前錄得零下43.8℃極低溫，如此天氣並非人人捱得住，若是感冒小病痛，一般窮苦大眾寧選擇買「看門口」的藥食住先，頂唔住先睇醫生，金天旗下各種品牌好似有高檔中藥的御室、高檔西藥康醫生、兒童用藥淘氣貓等，加加埋埋幾百種藥足以應付需求。
更重要的是，公司在招股書提到金天計劃於2014年底前透過第三方互聯網服務供應商，推出電子商務醫藥零售業務，呢招對金天極為有效，因為長遠解決零售店和分銷業務毛利率逐步收窄的問題，若在淘寶等平台賣，顧客不只限於東北能夠發展至全國，而且另一隻代理藥股話發展電商業務，股價都倍倍聲，呢隻未來網上藥店股豈能不落鑊炒呢？該股昨日呈MACD雙牛，是時候開車！
Samantha
本欄逢周一、三、五刊出