世界盃仲有4個月就到，作為西班牙1號門將，卡斯拿斯到𠵱家都只能夠幫皇家馬德里喺盃賽亮相，斷斷續續咁喺西班牙盃同歐聯上陣，作為佢同西班牙國家隊球迷，都咪話唔擔心佢keep唔keep到個狀態。不過，教練安察洛堤最近接受訪問，就突然為聖卡斯開綠燈，話如果球隊入到歐聯決賽，唔排除會畀呢位靚仔門將喺季尾踢幾場西甲正選，等佢谷到更好嘅狀態，去應付歐聯決賽。
肥安出此言，係考慮到歐聯4強同決賽之間相差1個月，假如呢段時間一直唔畀卡斯拿斯上陣，一下子叫佢喺一場咁重要嘅決賽擔正，隨時孭鑊都唔定，所以畀佢踢幾場西甲打底穩陣啲。就咁聽落，好似對卡斯拿斯有着數，一來佢可以獲得更多上陣機會，博吓下季搶番正選，二來佢又可以操「弗」狀態去迎接世界盃。
肥安明玩嘢敷衍傳媒
不過，肥安似求其講幾句敷衍吓，等你哋唔好成日就聖卡斯走唔走人問長問短。首先，今季一路踢落嚟，肥安發自內心根本冇諗過因為聖卡斯喺盃賽表現唔錯，聯賽就棄用正印嘅迪亞高洛迪古斯，無論佢帶領皇馬喺西盃上陣8場、720分鐘內一球不失殺入決賽，都冇諗住喺西甲度用佢。所以喺盃賽用人氣極高嘅聖卡斯，只係想塞住球迷同傳媒把口；再者，西甲踢到𠵱家仲係三頭馬車同分咁緊湊，到季尾踢到如火如荼，肥安都冇可能臨時換門將，咁樣隨時影響軍心，分分鐘驚你聖卡斯狀態唔夠，連歐聯決賽都畀埋迪亞高把關。講真，聖卡斯都預咗今季得盃賽踢，亦唔稀罕季尾踢多幾場聯賽就曉飛，最近球會嘅取態都係似下季出售佢居多，我求大俠想同肥安講聲：你唔好畀啲假希望人啦！
又傳皇馬打包蘇七普巴
另外，《世界體育報》披露，皇馬今夏準備再買球星，打算用1.8億歐元（約19.1億港元）打包利物浦前鋒蘇亞雷斯同20歲嘅法國新星保羅普巴，我求大俠真係拭目以待，睇吓主席佩雷斯點樣打造呢隊新銀河艦隊。