無綫為咗河蟹，真係可以去到好盡！有觀眾發現，無綫J2台日前播出一集購自台灣三立都會台嘅《冒險王》，原裝版本中主持人惟毅同吳鳳明明話手上拎住「台灣國旗」，當時對白打出惟毅大嗌：「國旗耶！」、「裏面有國旗」。點知J2播出嘅版本，竟然擅自將台灣國旗貶成區旗：粵語配音變成「裏面有支旗呀！」，字幕就變「裏面有區旗」。
唔少台灣觀眾睇到無綫「強姦」佢哋嘅節目嬲到震，大鬧：「香港無綫電視台此舉令我很憤怒，他們完全不尊重及侮辱台灣！」亦有人話：「香港人表示『CCTVB不意外』……香港政府正就CCTVB免費電視牌照續牌進行諮詢，大家也幫忙一起表達意見吧」。
事件惹網民狂批後，無綫myTV已經抽起呢集節目，以免醜事傳千里。查實無綫其中一個股東，就係台灣女首富、宏達電子（HTC）董事長王雪紅，唔知佢點睇無綫咁樣侮辱台灣呢？無綫對外事務科回應傳媒查詢時，最初話對外購節目嘅繙譯同字幕都有嚴格要求，會因應內容同本地慣常用語恰當繙譯；其後再補充時則認衰，話確實有個別工作人員出錯，絕不存在政治審查，佢哋會修改有關字幕同檢討工作流程。