梁振英借驅蝗事件大做文章，討好內地，其實係為咗洗底，洗擦佢上任以來，帶頭推動政策性歧視內地人所引起北京不滿，但一切太着迹，亦做得太遲。「未富先驕」論壇白癡之處，在於此四字真言，同樣適用於他引以為傲之「港人港地」及「限奶令」政策中，搬石頭砸自己腳，抽水太急露出馬腳。
梁休假回來，翌日行會立即衝出來訓斥市民，係因為徵收入境稅建議，唔單止建制派唔反對，政府內有官員也支持，梁上次限奶令已遭北京訓斥，今次才氣急敗壞急急將入境稅建議消滅於萌芽狀態。黨媒今次大造文章指摘香港人，騰訊分析內地「恩主」心態激嬲香港人，此乃官方宣傳刻意製造之後果，借貶低香港來令內地人有一種虛榮，阿Q式精神勝利法。
強國人心態是認為自2008年金融海嘯後，風景這邊獨好，全世界都渴求人民幣，爭取中國遊客，偏偏香港人不識好歹，扮晒嘢，內地土豪眼中此等「扮上菜」姿態，十分反感，老子有錢，要乜都得，夠膽出言頂撞？未死過！豈止「恩主」心態，實情就是土豪「恩客」作風。呢種官方態度實際上已乞人憎，但貶低香港，似乎已成為國策、宣傳主旋律，英文叫做patronizing。
強國崛起 天朝意識再現
內地非官方傳媒知道呢種叫「恩主」心態，我哋叫做patronizing。大家唔明，不妨在有線重溫食神，當史堤芬周仆直後，谷德昭搭住膊頭同佢講：「畀心機，你得㗎！」表面係種鼓勵，實際擺出一種我尊你卑姿態，用長輩語調教導晚輩。強國人心理複雜，明知香港乃自由進步地方，八十年代以來渴望得到香港人認同，現時有機會擺出副救濟香港姿態，你話幾過癮。口頭表示全力支持香港發展，實際上顯示一種以我為主，你要靠我。
本來香港人睇唔到自由行背後所展示之patronizing心態，直到梁振英「未富先驕」四字出台，就畫龍點睛，豁然開朗。大家正疑惑佢點解會話香港人窮呢，人均所得高過內地咁多。
梁之說法就有意貶低香港人地位，討內地人歡心，顯示內地是「主」，香港是「從」。呢種侍從關係，歷史上有深厚根源，來自天朝大國以我為尊之朝貢體系，四方蠻夷來朝只要接受侍從關係，必定大大賞賜。
強國崛起，重新建立天朝意識，自由行是一種賞賜，香港刁民唔單止不懂叩謝，仲阿支阿左多多聲氣，仲以為自己係香港主人？
添馬男