上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：邊個係英軍奇兵。
周中寫歐聯話題，用上高登仔用語呂布嚟形容伊巴謙莫域，球壇既有三姓家奴，自然也有忠心不事二主嘅關羽，修咸頓名宿中場拿鐵斯就係英超忠臣代表。
講真如果拿鐵斯唔係一直屈喺當年只屬護級分子嘅修咸頓，又點會只得8頂英格蘭國家隊喼帽？睇番1996年歐國盃、1998世界盃英軍名單，拿鐵斯又點差得過史東、安達頓、班比等，但始終未能得到當時英格蘭領隊歡心，一直都未能出席國際大賽。
睇番𠵱家修咸頓陣容，雙核積洛迪古斯同拉爾拉拿真係踢到識飛，兩人只不過24、5歲，當打到不得了，又有腳法又有速度。勝任兩翼同進攻中場嘅拉爾拉拿，最厲害嘅武器就係引球過關斬將；加斯居尼當打時期都係扭得，小弟唔覺得拉爾拉拿差佢好多。積洛迪古斯就勝在把握力好，今季亦轟入唔少靚波；老將列基林拔開始走下坡，「聖人」都保持中上游排名，都真係靠晒佢哋。英格蘭領隊鶴臣係就係成日睇修咸頓比賽，美其名考察呢兩位新星，但結果兩人到𠵱家加埋嘅喼帽，都只得3頂。
或者有人批評，修咸頓始終冇份踢歐聯，亦都冇踢過咩大賽，兩人級數仲未得到證明。小弟唔希望因為歐聯兩個字，就要逼呢兩位天才離隊，鶴臣如果真係信唔過二人，不如整個英國全民投票，睇吓佢哋支持修咸頓雙核，定係韋碧克、占士米拿等孭住大會名，但又冇咩表現嘅所謂球星。
文：牽牛