楊崢同黃宗澤驚爆姊弟戀，隨之而嚟是非日日新鮮，前日俾歐陽妙芝數臭佢搶走黃佩霞男友後，比楊崢遲出道嘅姚書軼（Mikki），噚日喺金鐘出席珠寶活動，力撐妙芝話：「妙芝係性情中人，係好姊妹，不過我同楊崢唔熟，合作做嘢一隻手都數得晒，做嘢方式唔同，出到去我哋一堆人，佢會唔知去咗邊，佢名模吖嘛！」Mikki越講越興起話：「有次做完騷都見唔到佢，咁都得㗎咩？可能當時有意外啦！」
陳嘉容認冇偈傾
遭群模圍插嘅楊崢，噚日如常揸住男友架古董車返商台開咪，喺節目度俾拍檔寸又做咗今日新聞娛頭，楊崢話：「十幾年前已講過，兩、三星期前已回應過，講咗咁耐都覺得悶。」做完節目楊崢喺停車場受訪話：「有睇報道，冇唔開心，否認過好多次，再否認再否認都冇用。」有人問幾時會俾人收車，佢扮聽唔到轉身走。有冇後悔愛得太高調甚至面臨分手？佢話：「一向都冇高調，畀啲空間我哋！」另外，陳嘉容噚日下晝喺中環置地嘆茶，佢唔認同黃宗澤拍過拖，但認同楊崢冇交流。
撰文：馮仁昭
