港資安全套品牌「奧妮」推出嘅一款安全套，舊年底獲健力士世界紀錄認證，確認呢款平均厚度0.036mm嘅產品係最薄橡膠安全套。生產商廣州大明聯合橡膠製品董事總經理陳維德，深明呢盤生意不成功，便成「人」，用過產品先至會推出市場。
廣州大明屬家族生意，陳維德今年27歲，大學工程系畢業後就喺公司幫手。佢指，呢盤生意嘅安全監督要做得好足，稍為鬆懈都會「搞出人命」。
佢之後仲想挑戰自己嘅紀錄，令到安全套再薄啲，又諗住研發體內震動型、納米型套套，甚至推出多啲周邊商品，如潤滑劑、性玩具，終極目標係在港上市。
佢笑住話，呢份工曾經帶來好多唔方便，佢由細到大都唔敢同朋友仔講自己阿爸做乜，覺得非常尷尬，仲話未結婚，都唔敢講畀老婆知自己屋企做乜生意。