阿信屋老闆林偉駿憑759阿信屋打響名堂，母公司CEC國際（759）嘅市值唔使半年由7億元變成20億元，佢噚日出席一個社企活動，就吸引好多社企老闆向佢取經，甚至即場傾合作。
林偉駿唔係寸嘴一名，但講到做生意就相當認真，會兜口兜面話人。佢憶述，曾經跟一間賣薑餅嘅社企合作，對方唔肯用機械化生產，於是佢大鬧對方「咁樣點得，死得啦！」
唔止合作夥伴，林老闆對現場觀眾都冇情講。噚日活動有過百名社企老闆、從業員出席，有小賣店老闆話自己喺醫院同學校開舖，地方大，舖租貴，但就冇乜貨好賣。林老闆毫不留情咁話佢，既然未建立好渠道，就唔好霸咁大地方，「要嚟擺張乒乓波枱入去咩？」
亦有老闆話由分銷商攞貨好貴，利潤「只有」30%至40%，林老闆即刻喺台上大笑，用寸對方嘅口脗話「如果我有三、四成，真係即刻笑出嚟！」
參加者即場傾合作
林偉駿又大談做老闆之道，指老闆有好多嘢要兼顧，員工做得唔好，唔係炒咗佢了事。另外又要對客同埋處理啲貨，若發現冇做老闆嘅特質，做打工皇帝好過。
除咗取經，有社企老闆即場跟林偉駿傾合作，例如問佢可否擺貨喺阿信屋寄賣，或能否用平啲價錢批貨，林老闆都冇托手踭。佢話對社企或有需要嘅非牟利機構，一直都唔講利潤，淨係計運費。佢仲即場公開手機號碼，叫大家有乜需要就搵佢。公平棧喺會後就第一時間打電話畀佢，認真快手。
李華華
mailto:[email protected]