美國《體育畫報》（SI）嘅金禧泳裝特刊喺禮拜二出街，有份影嘅皇馬球星C朗女友艾琳娜都有去紐約宣傳，仲連踩兩場；喺日頭嘅活動，仲帶埋都有份影嘅芭比公仔一齊去㖭。
艾琳娜喺日頭着得比較causal，但都凸顯玲瓏浮凸嘅身材。英國傳媒仲話佢揀着粉藍色連身裙係支持男友，力撐同日喺歐聯大戰皇馬死敵巴塞嘅曼城，可惜曼城最後都輸0:2。夜晚嗰場係酒會，所以艾琳娜都隆重其事，換咗條黑色吊帶裙，大方咁show事業線畀大家睇。
話明係《SI》泳裝特刊，女運動員當然有份影啦！外國記者睇過本特刊後，重點推介美國女子足球員雅歷絲摩根、WNBA球員狄珍絲同滑浪選手雅舒妮。雖然佢哋係玩運動，但拍落班超模度都冇被比下去，一樣咁索，令你喺呢個嚴冬，眼睛一樣大吃冰淇淋。
另外，皇馬主場對巴塞場國家打吡，暫定喺3月23日深夜4點開波，本港球迷想睇就要捱夜啲嘞！