科網股一如預期繼續炒爆，長命game王Candy Crush嘅開發商，宣佈喺美國上市，成為今次瘋狂派對嘅藥引，博雅（434）、IGG（8002）曾漲逾一成，分別創即市及收市新高，早前嘅蟹貨成功鬆綁，從強者越強嘅角度出發，後市易升難跌。
打機不離手機，以前iPhone及Samsung機受萬人景仰，而家國產機才是王道，本欄多番推介嘅TCL通訊（2618），將於下周一放榜，靚靚業績配合三大賣點，呢幾日乃最後上車機會，萬勿錯過。
賣點一︰成功升呢。根據Strategy Analytics最新報告顯示，TCL-Alcatel首次躍升為全球第五大手機廠商，市佔率達3.9%，上月智能手機銷量按年升近3倍至231萬部，動力十足，新機IDOL X+更成功入圍「2014國際消費電子展最佳智能手機」，冇得輸！
賣點二︰券商唱好。美銀美林發表報告，極度看好TCL今年的出貨量，加上世界移動通訊大會下周舉行，在兩大催化劑下，乘勢將其目標價大幅調高至12.3元，潛在升幅達四成。
賣點三︰圖表靚絕。自月初突破橫行區水平後，一直守穩其上，噚日似有突破三角形走勢迹象，一旦升穿9.2元高位，要追貨相信唔係咁易，有平貨買趁手。
唐牛