娛樂圈最近有幾對夫婦離婚，有一對仲只係結婚一年左右，不過其實唔夾起上嚟，結婚後發現貨不對辦，幾個月都可以話離就離。人與人嘅關係係咁，公司之間都係，hmv舊年底搵來廖創興家族成員廖偉芬（Jennifer）旗下連鎖咖啡店合作開舖，原來開舖唔夠三個月就拆夥了。
傳聞雙方好多「火花」
私募基金匯友資本舊年初收購hmv香港同新加坡業務後，匯友資本老闆胡景邵（Kelvin）一直諗計改善hmv嘅經營模式，增加收入來源，佢識得Jennifer，就搵對方合作喺hmv店舖內開咖啡店，等人一邊聽歌買碟，一邊嘆咖啡。中環同跑馬地兩間hmv kafé舊年11月正式開業，當時仲喺跑馬地嗰間搞咗個開幕酒會，Cool魔張智霖、香港電視（1137）老闆王維基仲有撐場㖭。
點知開舖唔夠三個月，今年1月初，Jennifer旗下The Coffee Academïcs正式跟hmv kafé結束合作關係。咁快就拆檔，當然因為合作得唔愉快啦，聽聞雙方合作後產生好多「火花」，有人好唔高興，於是不歡而散。
Kelvin承認，已經跟The Coffee Academïcs結束合作關係，佢話同對方簽咗半年顧問合約，合約今年1月期滿，細節傾得唔係咁好，於是就冇繼續合作落去。兩間hmv kafé𠵱家由佢哋自己營運，最明顯係，logo冇咗對方咖啡店個名。
李華華
mailto:[email protected]