梁振英一句未富先驕，訓斥市民，煽動矛盾，用心險惡。政府功能係要化解衝突，消弭分歧，民粹政客可以利用衝突矛盾抽水，如法國、澳洲極右政黨分子，但當權執政者帶頭推行歧視性政策，就大有問題，而各問責官員唔阻止，反而附和，就更加大有問題。
非理性政府助長反蝗
限奶令係最癲最戇居之行為，本來毋須立法針對內地人，只需修改現行法例中規定要有庫存之物資清單便可，一如政府監管食米模式，進口商負責提供足夠庫存，避免代理商、零售商聯手製造短缺現象達到抬價目標。但民粹政客為求即時見效，便動用「核彈打蚊」，放棄政策理性，一味追求政治效果。梁借中港矛盾抽乾水，一度奪回部份民望，但後果係助長咗反蝗氣勢，認為行動取得成果，梁振英成為黨媒口中所謂「病態本土主義」幕後推手。
政府放棄政策理性的第二步，係來自單程證配額，係人都知班人唔敢出聲要求取回審批權，但當家庭團聚配額用唔完，同內地商討削減每日150個名額，乃理所當然，何以官員擺出一副冇得傾姿態呢？但凡觸及內地政策，就軟手軟腳，為求政治正確而無所作為。
第三步令矛盾擴大，源於另一種福利民粹，林鄭搶佔民望，大派福利，關愛基金連工廈非法劏房戶都照派津貼，去到全無規矩可言！自終審法院判政府綜援居港年限規定敗訴後，基層市民對新移民來港領取福利反感，但林鄭民粹政客上身，反而再加速派錢，推出低收入生活津貼，不設居港限制，結果引起民情反彈。
現時矛盾擴大，已非自由行overload咁簡單，而係政府一連串非理性政策造成之後果，情緒借反蝗驅蝗爆發出嚟，越基層、反蝗情緒越大，黨媒港官即使不斷攻擊反蝗行動，亦唔會扭轉到呢種情緒，如果一旦經濟環境逆轉，就更加大鑊。
民粹係兩面刃，政客借民粹搞民望工程，追求短期政治效益，目光如豆，不計長遠後果。到內地不滿，為求政治正確，就忽然站在道德高地上，大講包容、同根同宗，真可笑。
當日有份支持立法歧視內地人買奶粉帶出境之局長司長，支持歧視內地人來港置業之「港人港地」政策，其身不正，有何資格去訓斥反蝗人士。反蝗人士至少言行一致，梁振英、林鄭月娥、高永文、黎棟國等人，其所作所為，政客作風，更為不堪！
添馬男