楊千嬅拿過無數女歌手獎項，登上過影后之位，也曾獲十大傑青殊榮，是圈中女中豪傑。可是當她踏入女人四十這個人生新階段，才赫然發覺自己要從頭再來學做普通女人，擔當丁師奶湊仔、打點家務忙過拍戲，尋常生活中鬧出不少笑話，從前那位烈女，今天順利過渡成為眼前這位烈媽。
撰文：趙潔恆
攝影：譚達文
不介意別人稱她為丁師奶的楊千嬅，訪問那天特別約得早一點，想必希望早點回家照顧兒子。早前過新年放了個大假養尊處優，她樂得做位尋常主婦，打點家中事務，過年時要辦年貨，她忙不過來，因為一切從頭開始，再學做女人，她自謔道：「我40歲啦，呢幾年我先學識點樣做一個女人同埋做正常女人會做嘅事。我以前唔識得買年花呢啲事，去紅館收花籃就收得多，你叫我買年花？我連蘭花都唔知係乜，買水仙原來要拎個盆去嘅，同檔主嘅對話可以拎嚟拍戲，簡直係雞同鴨講，好搞笑。新年要幫阿仔買新衫，要買大一啲，我本來覺得着起鬆泡泡唔好睇，但小朋友大得快，買大一啲可以着耐一啲。做咗人哋老婆同阿媽，就咁樣每年學識多一樣嘢 。」
照顧兒子 護士上身
跟丁子高婚後甜蜜的千嬅，在2012年誕下兒子丁進諾Torres，二人世界變成三人行，生活重心大轉移。她一講湊仔經，欲罷不能地滔滔不絕，愛子情深溢於言表。不少現代父母很多過份緊張兒女，變成「怪獸家長」，千嬅疼愛兒子Torres，也曾化身緊張大師：「我一向都有潔癖，產後我嘅潔癖更嚴重，會經常諗起從前喺醫院做護士時嘅經驗。我老公覺得我好怪，佢話我咁樣會變怪獸，我話我係professional，我係將做護士嘅知識應用一下；後來知道自己係over咗，經常護士上身，其實有啲事唔使太緊張。𠵱家好啲，因為始終囝囝大咗，照顧起來容易咗，𠵱家反而關心佢嘅潛能，鍾意做乜，開始踏入第二個階段啦，比拍一套戲更忙。」小Torres現在一歲多，正值牙牙學語的模仿期，還遺傳了千嬅的歌唱基因，小小年紀就愛上唱歌：「為乜會發現嘅呢? 因為我老公好喜歡喺屋企唱卡拉OK，佢就會聽住爹哋唱，之前佢就坐喺高腳椅上，𠵱家識行就要拎支真咪，俾支筆佢扮咪佢都唔要；佢𠵱家識講卡拉OK啦，瞓醒覺第一件事就同我講：『媽咪，OK！OK！』。知佢喜歡音樂，就畀佢聽多啲，朋友話好多小朋友鍾意聽郭富城啲快歌，邊聽邊跳，可以有助佢哋手腳活動，我即管試試。又俾外國rapper佢聽，佢先係皺眉，但腳印印打拍子，就俾佢接觸唔同嘅音樂吧！」
家庭為重 平衡工作
千嬅去年接拍了兩部電影，又馬不停蹄去紐約、上海等地公幹，對於兼顧工作與家庭，烈媽自有堅持：「排工作時，一定係家庭同小朋友放喺優先，佢哋太重要啦，但工作我都唔會放棄。」在千嬅的心目中，平衡家庭與事業原來是令家庭和諧的重要因素，也是令自己在伴侶面前保持新鮮感的良方：「當你有自己嘅事業同精神寄託，就唔會將自己嘅野心同專注力全都放喺老公、囝囝同家庭上，大家嘅壓力唔會太重。而且保持自己嘅機器開着，有增值嘅機會，返到屋企有多啲唔同話題，可以開發大家嘅大腦，相處上都輕鬆啲，或者帶來新鮮感。覺得唔一定到40歲就乜都唔做，有好多事仲可突破自己。」千嬅戰意仍盛，放完長假，即將投入職業女性的角色當中：「是時候由丁師奶轉mode（模式）做番女明星啦！」
最愛拍喜劇
楊千嬅去年憑《春嬌與志明》登上香港電影金像獎影后寶座，締造了從影以來的高峯。去年接拍了《香港仔》與《單身男女2》，兩部電影都將於今年上映，當了影后之後會否在演戲方面尋求突破，她道：「其實我最鍾意拍喜劇，最難拍都係喜劇，我覺得年紀越大人生閱歷多咗，演繹都會唔同，如果要為咗角色去學功夫，我覺得why not？」
造型：盧曉蓮
髮型：Sam Pang of La Mod Salon
化妝：Ling Chan of ZING The Makeup School
場地：藝穗會 Fringe Dairy
更多精采時尚內容，盡在 http://add.appledaily.com。