老牌發展商協成行噚日舉行傳媒春茗，董事總經理方文雄帶埋大仔方添輝（Jonathan）出席。年僅25歲嘅Jonathan，幾年前喺美國大學畢業後返香港，加入恒生銀行（011）做投資分析員，約一年前返家族公司幫手。
Jonathan話，最唔慣係有返工冇放工，事關佢阿爸係老闆，放工返到屋企都會照傾公事，感覺冇放過工。試過有次阿爸半夜兩點幾瞓唔着，摷醒佢傾公事，傾到四、五點先放人，第二朝九點又要返工，真係好難頂。
Jonathan現任助理項目經理，主力發展旗下中環荷李活道Madera Hollywood酒店，呢間酒店提供38個房間，將會擺放唔少五、六十年代荷李活著名影星如瑪麗蓮夢露、柯德莉夏萍及差利卓別靈嘅遺物，全部十幾件喺拍賣會投得，當中最貴係差利拍戲時用過嘅士的同帽，兩件共值6萬美金。