身為阿爺親生仔嘅民建聯，竟然都嫌水源唔多夠，要儲定子彈迎戰2015年區議會同2016年立法會選舉，所以鐵定4月15日喺會展筵開至少60圍，搞大型籌款晚會吸一吸金，買枱價錢按同表演台距離劃分為三種，最貴28萬、最平8.8萬，中間位就18萬一張。
要啲善長慷慨解囊，必定要有名人自動獻身，八方聽聞晚宴一大籌款環節高潮，就係主席譚耀宗開金口獻唱……大家唔好覺得反高潮，狂噓八方住先啦，事關戲肉唔係主角而係一眾配角，據知包括元秋、李慧琼同葛珮帆在內嘅民記女將，都會上台伴舞，一班年輕男丁例如何俊賢、陳克勤同陳恒鑌，亦可能踩台做路人甲，唔畀主席搶風頭。至於其他表演節目就要賣關子，唔知Tree根會唔會表演棟篤笑呢？