近來網上流傳一篇潮文，話如果男士有一個韓劇狂迷女友，被飛嘅機會好大。事關近來一套《來自星星的你》，令唔少女仔中毒極深，對男友炮擊浪漫嘅要求越來越高。
一套《星星》掀起亞洲煲劇熱，甚至令劇中出過鏡嘅名牌產品大賣，衣履化妝品唔在講，連全智賢喺劇中用過嘅風筒，以至佢最愛食嘅炸雞，都被標籤為「浪漫潮物」，可想而知女人中「劇」毒所帶來嘅非理性商機係幾咁龐大。
講到受惠股，新秀麗（1910）一定有份。新秀麗早於劇集播出前，已簽咗男主角金秀賢同Angelababy拍檔代言。試問《星星》未出街前，亞洲有幾多人聽過金秀賢呢個名？不過，套劇爆紅令佢身價直線飆升，下個月展開亞洲巡迴宣傳，每場酬勞高達25萬美金。相信新秀麗事前都估唔到，當日簽呢個後生仔，人氣竟然會超越Angelababy。新秀麗成功「趁低吸納」金秀賢，最少賺咗代言費差價。
諗住靠韓流食糊嘅仲有安踏（2020），剛公佈搵咗之前大熱嘅韓劇《繼承者們》男主角李敏鎬，為旗下Fila x Anna Sui系列代言。Fila行高檔路線，搵國際一線男星做代言當然啱。不過韓國娛樂圈勝在人才多，少女們好易見異思遷，希望安踏唔會係以「摸頂價」簽咗李敏鎬。話時話，仲有幾多人記得《江南Style》個PSY？
Fifi
本欄逢周二、四刊出