有女人嘅地方，一定有是非㗎嘞，尤其爭風呷醋呢啲嘢，好難避嘅。官場一直流傳，食物及衞生局兩位女將，副局長陳肇始同政治助理陳凱欣，雖然都係局長高永文搵返嚟，但兩女唔多咬弦；副局自嘆管唔掂政助，政助又擺明唔聽副局支笛。面對兩女爭風呷醋，夾喺中間嘅民望高，如何是好呢？
私下呻合作有難度
最近食衞局因為禽流感殺雞問題忙到癲，高永文先後派出雙陳同雞農雞販會面。唔少政界中人話呢招女人戰術唔錯，就算班雞農雞販㷫過辣雞，對住女人，都一定口下留情，要擺平件事容易好多，有人亦讚兩位女將肯孭飛，至於功架就不相伯仲冇乜高低。
之不過，兩位女將為個局賣力拆彈、各自爭取表現之時，原來私底下唔多啱key。八方接觸過唔少來自兩方嘅消息人士，分別引述兩女私下不約而同大呻，同對方合作有難度；有冇互數不是呢？八方只得三個字：不予置評。始終人夾人緣嘛，好難要求百分百合拍嘅，只要唔影響工作就得啦。
有口痕友話，陳肇始同陳凱欣都係民望高親自揀蟀，係唔係爭風呷醋咋？八方當然唔可以代答，只係覺得夾喺中間嘅民望高，唔知會唔會做個中間人，拉攏佢哋修好做手帕交呢？
mailto:[email protected]