當年嘅《霸王花》電影系列，戲中嘅一班女星除咗靚之餘，仲好打得。監製過《爆3俏嬌娃》同《含忍．死人．的士佬》嘅黃永峰（Charlie）嚟緊會開拍一套類似題材叫《辣警學堂》嘅戲，會集《霸王花》同荷李活電影《學警出更》（Police Academy）系列於一身。
血腥賣性感
Charlie預計會搵何佩瑜（Jeana）、江若琳、李雲迪愛徒李元玲同埋拍過《微交少女》嘅新人許雅婷（Kabby）演出，佢噚日接受電話訪問時話：「套戲當然唔少得動作，仲會有血腥同暴力，亦都唔少得性感鏡頭，男演員方面應該會係安志杰，導演係錢國偉。」佢話Jeana等一班女仔三個月前已經跟師傅練拳，𠵱家個個都操到有腹肌，Charlie話：「其實最想搵小紅姐惠英紅，因為佢拍過《霸王花》，如果佢肯拍，意義會大好多。」講明致敬《霸》片，題材當然都會類同，講一班新紮師妹喺警校時，畀人調咗去做卧底，套戲大概會喺5月開工，仲會去馬來西亞取景。
撰文：馮仁昭