真想再看《華爾街狼人》，第一次覺得3小時的電影這麼快便結束，第一次覺得沒有粗口這個世界便不完整，第一次覺得，如果沒有性和毒品……come on，齋講已經覺得生無可戀。
馬田史高西斯，拍片諷刺美國資本主義的貪婪；但正如以前的《華爾街》電影系列，明明拍的時候想諷刺，拍出來觀眾收到的，卻是羨慕妒忌恨。劇中金句：「有咁耐風流有咁耐折墮」，問題係，我唔風流都一樣折墮！喺我搶奶粉俾個仔嘅時候，係咪都可以俾我搶第二啲奶，自己享用呢？
電影每隔兩秒就有吸毒鏡頭，我明明諗住「企硬，take嘢衰硬」；點知當劇情講到隻遊艇就嚟沉船，而可謂沉船之父嘅鐵達尼男主角里安納度，竟然死到臨頭仲要吸毒，原因係「我不要清醒地死去」。
戲院很安靜，沒有人嗤之以鼻，大家暗中祈禱，一定要俾佢食到。
清醒看着自己走向衰老滅亡，等於check強積金條數。傻的嗎？
劇中最震撼一幕，是里安納度被《富布斯》雜誌批評為「只求賺錢不擇手段的狼人」，他以為自己一鋪玩完，誰知世界變了樣，人們不介意這種赤裸裸的坦白，反而欣賞他的貪婪，蜂擁要投奔門下。
李嘉誠話俾你同佢一齊搵食，你點會拒絕？
我們一點不介意賺錢的手段，我們只想賺錢。
劇中名言：「你唔鍾意錢，你去麥記打工啦！」
錢，才是第一男主角。有錢，可以夜夜操不同身價的女人；有錢，可以合法地找侏儒當公司開派對的玩物而不必惹上歧視官非；有錢，可以take完嘢甚至非禮空姐也不必被趕落客機，因為他坐的是頭等。
有錢，馬田史高西斯才能拍一部諷刺資本主義斂財貪婪的電影。
我們，其實都想做狼人。