華人置業（127）大股東劉鑾雄（大劉）女友呂麗君（圖）家人連環買入華置旗下位於灣仔嘅壹環單位。繼呂麗君媽媽舊年買入一伙之後，佢爸爸同阿哥最近就以5,120萬元，買入壹環45樓一個實呎1,363平方呎嘅單位，連一個私家車位同電單車位。
壹環睇落都幾受大劉嘅親人同女友歡迎，大劉胞妹劉玉珍早於2012年初以902.2萬元，買入23樓一個單位。
大劉另一位女友陳凱韻（甘比）舊年初就買入40樓一個實呎848呎嘅單位，涉資2,270萬元。8月就到呂麗君媽媽用1,796萬元，買入一個實呎848呎嘅單位；𠵱家就到呂麗君爸爸同阿哥。唔通呢個樓盤風水好，自用同投資一流？