遠在紐約做名作家/大教授資料研究助理及撰稿員，並且主持英文podcast節目嘅小B來電郵，話買咗一份禮物，趁一位記者A回港過年之便，托佢送上左丁山辦公室，小B盛讚記者A：「佢係我見過咁多中大畢業生之中，講英文最好嘅一位，能在紐約大傳媒機構做採訪工作，建立廣泛基金經理網絡，你估咁易咩。」講到咁樣，都幾想見記者A一次。
此日中午啱啱想開門出外吃飯，竟然就碰到記者A入門，於是同佢傾咗十分鐘，佢話係中大新聞系畢業生（崇基），99年畢業，做過幾份工，包括新加坡電視台，之後就加入杜瓊斯，後被派往紐約專做財務金融、對沖基金採訪工作。問佢英文點解咁好，佢話：「唔係吖，小B見得中大學生少箒嘛。」或者係啩。小B大概只係見慣我地屋企嘅六位新亞生！
新亞新聞系學生曾在 Dow Jones機構（現已與華爾街日報分家）做過嘅，左丁山只識得馮強（1979），佢在亞洲華爾街日報做中國新聞，十分出色，現在係浸會大學財經新聞碩士班課程主任；另一位係梁鳳儀（1982）（Julia Leung），Julia在哥倫比亞大學讀完新聞碩士就加入亞洲華爾街日報，又係採訪中國新聞，後來扶搖直上，加入金管局，再到特區政府做財經及庫務局副局長，去年辭職，未來去向如何，備受關注。有消息話，佢過冷河之後，獵頭族與國際機構可能會「郁佢」喎。左丁山以此為例，鼓勵記者A將來更上幾層樓，成為另一位出色中大新聞系校友。
賓架R有女就讀中大社會學院，話要主修新聞，賓架R聽見就問我地點睇，因為播音C話俾佢聽，不理各行各業加薪如何，新聞系學生入傳媒機構，二十年來未加過人工，做記者全靠興趣，與賺錢無緣。左丁山認為無所謂啦，子女讀邊科冇乜所謂咯，時下年輕人最緊要講興趣，強逼唔嚟。日前與信用卡公司高層吃飯，佢以前係滙豐嘅MT，佢話有啲MT所以加入銀行，純粹係為咗（一）證明自己有料，（二）向父母交代自己有料。在銀行做咗三年，升職之途光明之際，就辭職不幹，話既然已向父母交代咗，以後就行自己道路追求自己真正興趣喎！同樣故事，左丁山亦有聽過，一位名人之女做咗三年律師，就辭職去做小學教師，問佢點解，佢話：「讀法律係阿爸逼我嘅，佢好想我做律師，我滿足咗佢嘅願望咯，就做番自己喜歡之事。」