上屆中超同亞冠盃雙料冠軍廣州恒大，年年使嘅錢都億億聲，又簽高價外援又派豐厚獎金，當然想出埋名；不過恒大周一搞個開季記者會，風頭竟然比唔上一支四川乙組仔！點解？因為呢支叫力達士嘅乙組仔，搵到靚女艾如做班主，一招美女計就KO恒大。
迪亞文迪亮相冇人理
講真，恒大呢個賽前記者會都有啲睇頭，球隊安排3位新兵亮相，最大名氣當然係意大利國腳迪亞文迪，呢位進攻中場仲叫大家唔好攞佢嚟同已經離隊嘅孔卡比較；又話唔擔心踢中超，會影響佢代表意大利踢世界盃嘅機會。而會方亦都落實，教練納比教埋今季就會離隊，呢位幫恒大贏盡中超同亞冠盃嘅名牌教頭，仲盛傳會轉任中國國家隊教練㖭。
選美出身話唔識足球
原本呢啲消息，應該霸晒國內外足球新聞嘅頭條位置，但風頭竟然及唔上一支乙組仔？講真，我求大俠對力達士係零認識兼零興趣，不過都俾呢位女班主吸引。24歲嘅艾如其實係選美出身，曾經贏過世界旅遊小姐冠軍，之後就轉戰娛樂圈，拍過劇集《裸婚時代》，不過無端端又會做班主？原來佢老竇係四川商人艾雅康，亦都係力達士嘅主要投資者，所以就叫艾如做球會董事長兼總經理，起碼吸引咗唔少男球迷嘅目光吖。
艾如都好老實，話自己對足球唔係太認識，加上工作關係，未必場場波都可以督師；不過就好有信心球隊嘅專業管理人員，會將球隊帶上正軌。其實世界上唔少大球會都係由女班主領軍，好似AC米蘭，「貝老」唔玩就交畀囡囡芭芭拉搞，芭芭拉仲同前AC米蘭前鋒柏圖拍過拖㖭，唔知力達士班球員又夠唔夠膽追呢位靚女班主呢？