12月、1月先嚟小錢荒，人行2月就正回購，咁快又收水？雖然專家話未確認人行係咪收緊銀根，但係起碼人行就係唔想放水畀你。
睇埋往績，原來近4年阿爺做全年第一次正回購，去到半年結，恒指都要跌，跌幅介乎2%至10%，睇嚟單睇指數，後市都係麻麻哋。
指數唔得箒，但係有冇得炒股唔炒市？上個星期一到今個星期一，日日有炒作主題，內房、環保、手遊支付股，輪住嚟炒，但單睇噚日正回購消息一出，恒指未跌，個股就全面靜晒，即時冇咗炒作主題。
後市或者會少咗短炒機會，投資者由而家到6月底前，爭取短線回報嘅難度，會比前幾個月高，揸實穩陣強勢股都算進可攻、退可攻，上半年埋單都有機會贏錢。
券商股國泰君安（1788）應該係其中一個好選擇。佢啱啱喺2月6日發盈喜，話舊年純利按年有顯著增長，增長主要來自買賣及經紀業務、貸款及融資業務及投資業務嘅強勁增長。一句講晒，舊年下半年交投旺咗，股市好炒咗，新股多咗，國泰君安盈利有得大升。以2012年市盈率21.5倍計算，2012年市盈率跌到去14.3倍，市賬率2倍左右，估值合理。
上市嘅國泰君安唔係內地嗰間券商，只包括香港業務，當佢本地券商股嘅話，同業股份包括耀才（1428）同海通國際（665），本來耀才走勢唔比國泰君安差，但周大福入股後，股價反而變軟腳蟹，有啲怪怪。國泰君安就跑贏海通，走勢相對硬淨。
國泰君安嘅收入來源，主要嚟自經紀業務、企業融資、資產管理，以及貸款融資利息收入，所謂貸款融資業務，咪即係炒股條孖展數，都係同港股市況相關。
受惠內地資金南下
雖然經紀業務係主業，應該同港股市況齊上齊落，但係企業融資同埋資產管理業務，收入基數低，加上佢嘅中資背景，令佢可以更受惠人民幣國際化、內地資金來港投資嘅大趨勢，所以呢個分部業務理應遠較經紀業務前景為佳，股價跑贏恒指變成合理不過，預計可見將來，國泰君安會好穩定、持續咁跑贏大市。
睇番個圖，國泰君安喺舊年11月中三中全會過後，爆咗兩棍大陽燭上去，到而家都冇跌破過3.7元嘅三中大陽燭頂部，雖然冇好似濠賭、科網、半新股爆升過，但走勢相當硬淨。相比恒指三中升完後，年尾一早打番晒落去，最近反彈完都遠未收復失地，足證股價持續跑贏大市思路正確。
今年目標價睇5元
國泰君安2月6日出盈喜，翌日升到4.19元然後打番落4元樓下，趕絕短線客，震倉完成，後市應該有運行，目標今年內穩穩陣陣可睇5元。
晉佳
本欄逢周三刊登