正所謂人逢喜事精神爽，如果好消息打孖上，就肯定春風滿面。講緊邊個咁開心？咪就係人稱陸叔嘅陳永陸（圖）囉。陸叔定居喺澳洲悉尼嘅囝囝，兩個月前幫佢添咗粒孫女，陸叔正式升呢做阿爺，真係恭喜晒。陸叔話之前飛咗去悉尼睇個孫女，一路講一路笑到見牙唔見眼，sweet到爆！不過，佢就溫馨提示大家，以後繼續叫佢做陸叔，話因為要有番咁上下江湖地位，先可以叫阿爺喎。
另一件喜事係乜？原來嚟緊5月1日，乃陸叔喺商台開咪15年嘅大日子！陸叔憶述，第一日開咪嘅拍檔，就係𠵱家商台副主席俞琤，認真巴閉。近排商台滿城風雨，但陸叔話做節目咁多年，都一直緊守崗位，揸住條底線做人，所以感受唔到高層有畀壓力，佢仲希望到20周年嘅時候，可以搞party慶祝㖭！