上周日驅蝗行動後，特區高官在林鄭指揮下，保安、政制及內地事務、工商等三位局長，都紛紛表態譴責。市民遊行示威，只有合法與不合法之分，官員在言論層面可以反擊示威者，表示唔認同佢地嘅言論，但擺出一副嚴打，乜嘢「唔容許同類事件發生」，就擺明未審先判，向執法當局施壓，一如當日有示威者闖入軍營示威。
中港矛盾由過去限於政治層面，全面擴大至社會生活層面，唔可能用一句「病態本土主義」就足以解釋。龍獅旗代表戀殖也好、對現狀不滿也好，網上鍵盤戰士走出來也好，關鍵係香港人點睇，背後社會基礎何在。
林鄭成政客 棄政策理性
梁振英用「未富先驕」訓斥市民，我認為係蓄意撥火搗亂，擴大矛盾。而政府由始至終，無認真看待反蝗力量在民間擴散，一味緊隨內地用意識形態鬥爭方式去處理一個公共政策問題。香港行政主導體制，唔講意識形態，只講常識、政策理性，當林鄭月娥變身政客後，已忘記咗乜嘢叫政策理性。由人口政策檢討，到自由行承受力研究，政府用「政治正確」、驚得罪內地態度去處理，欠缺政策理性，林鄭「人口增長無上限」一句無知sound bite，不知㷫慶咗幾多市民。蘇錦樑一句事不關己「等多班車」，網上俾人鬧到仆，但政府班官好似完全脫節，唔知群情洶湧。
現時問題係珠三角一小時生活圈，香港人同內地人同城化，共同生活問題，唔係廣東道逼爆自由行咁簡單，實在難以想像政府冇任何研究、預測及影響評估。而矛盾擴大同梁振英管治主要用政治手段處理政策議題有關，佢要拉高擴大矛盾，再一分為二，逼迫人歸邊。當佢要呃like，就化身「病態本土主義」者，鼓吹對內地人政策性歧視，「港人港地」、「港人港奶」、「港媽港床」，不理政府內部反對，仲癲到用立法方式限奶粉出境。自己玩民粹玩到過晒底線，自然引起北京不滿，結果港人港地仲未立法，就已銷聲匿迹！佢態度也如鐘擺般swing去另一邊，全面誠惶誠恐，幫手訓斥香港人「未富先驕」。
反蝗驅蝗係一種情緒發洩，表示對政府政策不滿，方法係有爭議，但當其他溫和中產，精英心態之政黨、學者、評論員都保持沉默，大家就知道，普通市民對自由行逼爆、珠三角一小時購物圈有幾大不滿。高薪厚祿司局長，繼續尸位素餐，好學唔學，學低水平政客用sound bite治港，媽叉示威者，誠惶誠恐，以向內地表態當做嘢。政府帶頭放下理性、政策討論，用政治、意識形態鬥爭方式處理，下一次衝突將更厲害！
添馬男