近期阿里巴巴消息一籮籮，貿易發展局噚晚舉行傳媒春茗，舊年續任多一年嘅主席蘇澤光（Jack So，圖）順便抽水，指早年馬雲帶團來港參觀貿發局嘅B2B服務，當日尚在偷師嘅阿里，今日已經成為業內霸主，佢亦感到與有榮焉。
席間Jack So自爆八達通嘅故事，名字真正原創人，原來係佢遊船河嘅朋友。Jack So於1995年至2003年出任地鐵主席，他回憶1996年同一班朋友遊船河期間，揸住一張卡，同朋友講，呢張卡將來十分方便，可以搭車、搭船、去邊都得，當中有位口痕友爆出一句「咁用張卡咪可以四通八達囉」。四通八達呢句成語就牢牢記喺佢腦內。
1996年八達通舉行徵名比賽，Jack So選出「八達通」呢個冠軍作品，翌年正式採用。
Jack So唔肯爆誰是口痕友，但就話傳媒老行尊中，好多都係佢嘅船友，叫大家自己估喎。