中國湖南省常德市最大嘅豬肉供應商之一惠生國際(1340)於香港上市,Prof J當然要𥄫一𥄫!以2012年嘅收益嚟睇,惠生名列常德市第一位、湖南省第三位同中國2,400個大型屠宰場的前20位,都算有angle!
阿爺政府頒布咗《全國生豬屠宰行業發展規劃綱要(2010至2015年)》同一系列政策,一句講晒:「淘汰低產能」嘅屠宰場、整合生豬養殖同屠宰行業,仲支持協助大型現代化屠宰場。
預計淘汰低產能同產品質量唔多掂嘅屠宰場,湖南省大型屠宰場嘅市場位置(特別係A類生豬定點屠宰企業)將得到進一步肯定,數目要由2015年前減到得番120間,行業整合對大型養殖場同屠宰場就非常着數。
屠宰場獲政府認可
惠生做生產豬肉產品同銷售的業務,其營運包括生豬繁殖及飼養,以及生豬屠宰,擁有自家品牌商標「歪脖脖」,即係我哋講嘅「一站式」。
除咗擁有龐大嘅屠宰能力,佢哋嘅屠宰場同加工廠綜合設施,係常德市政府認可嘅12家「A類合格生豬定點屠宰企業」之一,亦係唯一獲政府認可嘅定點屠宰場。惠生分別以質量管理同食品安全攞咗ISO9001同ISO22000嘅認證,基本面齊晒!
要捉住整合同擴展機遇(都係嗰句),興建新生產基地同新養殖場並聘請更多育肥飼養戶就事在必行,進一步擴充集團嘅繁殖同飼養能力同屠宰及加工能力;用優質肉嘅品質量、品牌同規模嘅優勢,加速發展自家主場品牌店,增强冷鮮肉嘅分銷鏈,生產新下游產品,豐富產品種類,提升覆蓋並進一步拓展市場。睇吓故事發展先!
徐燦傑
中國銀河國際財富管理主管
本欄逢周三刊出