此處不留人，自有留人處。狼振英上台後團結咗好多人……一齊反佢!人在江湖嘅，好似啲高級公務員咁，不便公開反枱，索性早走早着，盡早離開熱廚房算囉。
繼前排傳過幾位常任秘書長（常秘），譬如外號「頭箍小姐」嘅商經局區璟智、運房局栢志高、發展局韋志成同埋民政局楊立門，今年一夠鐘甚至未夠鐘就提早申請離職，官場近日盛傳現任政制及內地事務局常秘張琼瑤都有意提早退休，逍遙快活嘆世界。
盛傳張琼瑤萌去意
雖然八方唔知呢單傳聞堅定流，但張琼瑤係前朝特首煲呔曾嘅愛將之一，現年不過52歲，比楊立門仲要細一年，若果張琼瑤願意留守，應該來日方長。但官場最新盛傳，佢都想申請提早退休，似乎為狼班子打工真係好惡頂。
有同張琼瑤交過手嘅議員話，論能力，張琼瑤只屬一般，話張小姐有啲錫身，發生大鑊嘢嗰陣似乎都唔見咗人。但亦有人話呀，AO（政務官）出身嘅，通常都有一定質素保證。資深常秘買少見少，唔係政府之福。
講番轉頭，議員們異口同聲話呀，狼振英上場之後，政府做事唔跟程序嘅例子多不勝數，大家亦都有目共睹；向來習慣跟程序做事嘅AO，又點會唔俾狼英玩謝呢？八方如果身在熱廚房，眼見政改隨時火燒連環船，梗係走為上着啦！
mailto:[email protected]