經過周一瘋炒後，科網股狂勢稍為收歛，但低位明顯有買盤吸納，大如騰訊（700）、金山軟件（3888）等，都可以倒升收場，表面證供反映，炒作應該唔係一兩日貨仔。噚日推介嘅神州數字（8255），一度再漲近一成，相信消化超買壓力後，可再度啟航。另一方面，作為神州數字嘅策略股東，遠東控股（036）近日股價亦蠢動，集團早前宣佈，去年將因投資神州數字而錄得重大公平值盈利，全年業績已有保證，加上市值不足兩億，細細粒容易炒，值得兼顧。
憑揸爆炒股升呢嘅，其實仲有今日推介嘅佳寧娜（126）。集團現時持有約1.4億股華南城（1668），後者早前獲騰訊入股，股價今年累升逾倍，佳寧娜持股亦水漲船高，以昨日收市價4.18元計，總值6億銀，相當於市值逾兩成，吸引！佳寧娜自身亦概念十足，年初已事先張揚，將公司其中一項業務，即物業投資及發展業務，或者餐飲、食品及酒店業務分拆上市。睇番佳寧娜現價，較每股資產淨值折讓逾三成，一旦分拆成功，公司價值肯定進一步釋放，潛力一流！
睇圖表，佳寧娜噚日炒高7%，成功突破三角形走勢，兼有成交配合，話唔定有好消息跟尾，假設折讓係咁易收窄至兩成，可見2.45元，潛在升幅22%。
唐牛