商台名嘴李慧玲突然被炒，懷疑係一男子背後施壓所致，加上其他傳媒被抽廣告及換總編輯等迹象，香港新聞自由已岌岌可危，各位係時候發聲。香港記者協會聯同多個關注新聞自由團體及組織，喺周日（23日）發 起「企硬．反滅聲」遊行，抗議新聞自由被打壓。
活動前夕梗係要造勢。記協誠意出品《記協ViVA》傳媒反滅聲概念大碟（圖），特登搵嚟前記者、𠵱家係自由撰稿人嘅柳俊江，同港台節目《頭條新聞》主持曾志豪獻唱。第一首派台歌「你你你代李慧玲」噚日喺YouTube登場。呢首改編自「你為了愛情」嘅歌，一句「你你你代李慧玲，朝早都變靜；你你你代李慧玲，街坊都吃驚」，唱出市民心聲。
據聞，其他好歌如「自由無限好」等陸續有來。隨意唱到聲嘶力竭嘅空間，唔係唾手可得，如果唔想日後連唱歌空間都冇，星期日一齊去遊行啦！