利邦（891）噚日宣佈，主席馮國經女兒馮詠儀，今日起由利邦執行董事，調任非執行董事，袍金12萬元，原因係太子女要多啲時間放係利邦主要股東──馮氏零售集團嘅董事工作，莫非上市公司太難搞？
馮詠儀今年42歲，哈佛經濟學畢業，2000年加入家族生意馮氏集團做投資經理，2007年加入利邦董事局，有齊零售採購同公關經驗，仲身兼貿發局內地商貿諮詢委員會委員公職，丈夫林詩棋就係花旗私人銀行賓架。
馮氏零售集團旗下兩大上市公司，包括經銷高級男裝嘅利邦，同埋經營OK便利店同聖安娜嘅利亞（831），其餘仲有玩具反斗城等業務。
不過利邦同利亞中期純利都大退倒超過四成，跟手唔少大行大削利邦目標價，踩多一腳，確實係幾難搞，太子女睇番整體零售業務可能係更好嘅安排。