香港步入嚴冬，乜鬼嘢自由都被打壓，𠵱家連去廣東道遊行都可能要坐監。本地遊戲開發商「Kit Da Studio」就無懼強權，上年整咗嗰好多本土元素嘅手機遊戲「Touch Hero, Inc」，有成百隻小遊戲玩。
個遊戲最特別嘅地方係唔少內容反映港人最關心嘅嘢，好似毋忘六四、公民廣場反國教等，佢哋仲會將近期賣game嘅收益，捐晒畀學民仔。
「用遊戲做社會記錄」
八方噚日download嚟玩吓，其中有個game見到有件印有「64」嘅T恤好皺，遊戲要玩家用熨斗「平反」；另一個就喺玩搣月曆，相信唔少人細個都試過狂搣月曆俾阿媽鬧，但呢個月曆要狂搣去到「六月四日」就會停，等大家毋忘六四。
仲有一個遊戲就係有班人喺公民廣場舉牌反洗腦，但有警棍不斷將示威標語打落地，玩家就要好努力令到啲示威牌唔好被打落嚟，代表無論遇到乜阻力，港人都要堅持到底。
負責開發呢嗰App嘅負責人Kit Man希望用遊戲做社會記錄，而港人玩game之餘又有共鳴，仲可以透過遊戲帶出公民社會同民主運動訊息。
Kit Man仲話之前反國教就已好認同學民思潮嘅理念，所以今個月16號至下個月1號，只要去App store畀八蚊download個game，全部收益就會捐畀學民仔，所得款項全數會用於爭取全民提名，繼續支持佢哋街頭抗爭。不過，呢個game暫時得「果粉」先有得玩。
mailto:[email protected]