韓劇《來自星星的你》熱爆中港兩地，企業當然即刻做嘢，搵劇中男女主角做宣傳。馬化騰旗下騰訊（700）跟馬雲嘅阿里巴巴鬥得難分鬥解，呢次算係跑先一步。
騰訊旗下移動通訊程式微信，最近用咗劇中女主角全智賢話「下初雪時應該吃炸雞配啤酒」玩花臣，用戶打上「炸雞和啤酒」，微信就會出現落雪畫面，夠晒玩嘢。
𠵱家越來越多移動通訊程式，多朋友用係一個賣點，多得意公仔、案圖、花臣都會容易吸引用戶使用，馬化騰喺呢個細節都識得玩花臣，真係抵佢公司股價係咁升。
除咗微信之外，另一個移動通訊程式Line就搵《星星》男主角金秀賢做推廣。
新秀麗（1910）早前搵金秀賢做休閒袋品牌Samsonite RED嘅代言人， Line就出咗多款相關嘅真人版貼圖，不過暫時係地區限定。