香港政局左風凜冽，猶如十年前董下台前翻版。北京一直有一股政治力量，用香港來實現其政治利益，將香港原本簡單不過嘅普選問題，定性為和平演變、茉莉花革命、英美亡我之心不死、勾結外國勢力，軍情五處及中情局滲透，然後為左風及在香港搞政治鬥爭提供理據。當香港處於英美鬥爭前線時，駐港機構人員及編列之預算就自然增加，而幫手的本地建制派亦可多分一碗蛇羹。香港傳媒奇怪，明明係小眾龍獅旗團體，為何要出動黨媒煞有介事去批判，直接為佢哋宣傳及提高地位。香港就算有港獨，都係被抬舉出嚟。
梁系人馬靠鬥爭上位
維穩已成為中國最大產業，而共產黨管治，亦需要通過不斷製造敵人作為手段，維持內部團結。維穩之手伸入香港，不外乎搞媒體，一手硬，另一手軟，大灑金錢辦報辦網，又有得分，過水濕腳都幾happy。而對梁振英而言，搞寸個party，四方樹敵，自然得到利益，只有香港政治鬥爭尖銳，北京先會責成建制派團結在梁麾下，放下分歧，共禦外敵。梁振英深諳此道，因他一系人，包括一國兩制研究中心、邵善波、張志剛，全部係借中英鬥爭上位，為北京出謀獻策，監視敵對勢力一舉一動，向北京匯報。呢種手法用咗幾十年，一旦變成當權者，心態上根本亦難轉變過來，仍當香港鬥爭嚴峻。梁政府擅長製造敵人，其來有自。田北俊及自由黨員早在九七前已被視為港英餘孽二號，因此才耗用大量金錢成立新港盟及港進聯一大堆商界政治組織，到今時今日，梁當上特首，自然又將舊恨加上新仇一齊計數。
第二個舊恨新仇，係港英餘孽三號，殖民地公務員，林鄭歸降後，就剩低一個鬍鬚曾。梁就動員林奮強、陳啟宗、一棚梁粉地產佬公開郁佢，林奮強日日叫陣攻擊曾俊華守財奴，陳啟宗作急先鋒。你話幾可笑，將財政司司長視作政治鬥爭對象，前所未聞。鬍鬚曾唔單止代表佢個人，而係代表整個官僚科層理性呀，懵丙！梁及其智囊要動用金管局管理之香港盈餘在內地買地搞項目，有助佢拉攏地方勢力大搞其「內交」，以彌補中央欠缺人脈支持，究竟佢之「內交」大計，北京有冇首肯？要鬥倒財政司司長？自己要睇路，因為曾俊華代表之官僚理性，背後獲中央支持。
梁政府係一個視政治鬥爭為首要工作嘅政府，成功要有兩個先決條件，一是有魅力領袖，如游擊英雄、開國之父例如老毛、李光耀、蔣介石，另一個條件係有龐大群眾式政黨支持，梁振英兩樣都冇就學人鬥，結果不單冇辦法改造香港，而且打爛晒原本之秩序後，將一事無成，就如佢恩師董建華一樣。
添馬男