全年業績期殺到，下星期嘅焦點除咗係星期一派成績表嘅滙豐控股（005）之外，其實仲係超人李嘉誠旗下上市王國兼細仔李澤楷旗下電訊盈科（008）齊齊放榜嘅日子，成個星期都充滿李氏力場。
下周二係小超人李澤鉅做主席嘅長江基建（1038）同啱啱分拆港燈（2638）上市嘅電能實業（006）公佈業績，跟手小小超李澤楷旗下電訊盈科就喺下周四派成績表，壓軸就係長實（001）、和黃（013）下周五公佈業績。
除咗交唔交到功課，傳媒最關心，當然係超人下周五開唔開業績記者會。佢自舊年年頭碼頭工潮後，幾乎成年冇公開見傳媒，舊年長實、和黃股東會同中期業績都取消記者會。長實發言人噚日話，有消息就會通知大家，唔知超人仲有乜嘢要考慮呢？