特首梁振英（CY）周日缺席渣打馬拉松，但就相當畀面國泰航空（293）。佢上月先同基層小朋友坐國泰遊飛機河，噚日再出席國泰貨運站開幕禮，下月升任主席嘅國泰行政總裁史樂山應該開心晒。
CY唔去渣馬，佢解釋要平衡時間同工作需要，又話出席開嘅活動，唔係次次都要去。不過佢呢兩個月接連出席國泰活動，噚日仲帶埋運房局副局長邱誠武、民航處處長羅崇文等高官做嘉賓，仲等緊政府發牌嘅廉航捷星香港肯定好頭痕。
機管局主席張建東亦有現身，佢腳傷未好，戙住支拐杖，同CY全程冇乜交流。
同馮煒光快閃 冇理傳媒
CY係畀面國泰，但活動完咗，佢就同新聞統籌專員馮煒光快閃，冇理傳媒。
講番呢個貨運站，國泰花59億元，2010年動工，舊年10月正式投入運作，但一直蝕錢。國泰航空服務行政總裁丘應樺透露，貨運站使用率僅50%至60%，每分鐘都想賺多啲，將會邀請其他航空公司使用，提高使用率。