上周財金界的飯局，有兩個茶餘飯後最熱門的話題，排名不分先後：首先是某位甚具個人特色的投行高層被停職；而另一件，當然就係東莞掃黃事件啦！（呢兩件事係無關連嘅，大家千祈唔好誤會！）
一位金融界的朋友（他堅稱自己不是東莞的「常客」）就認為，今次掃黃事件，其實在財經角度上，可以有另一種解讀。事關據佢了解，在東莞，零星的掃黃行動其實周不時都有，只係唔會好似今次咁高調。而是次行動的「獨特之處」，是有一個被行家稱之為「鐵竇」、從來掃黃都不會掃到佢嘅太子酒店，居然被點名清場。呢間太子酒店的老闆梁耀輝，背景絕非一般，他本身是一間內地石油公司的老細，在哈薩克有幾個油井。在內地，搞石油呢種高度壟斷的行業，如果不是有勢力人士支持，可能性微乎其微。所以今次央視高調報道太子酒店，之後再配合掃黃，事件會否是項莊舞劍，意在沛公？
另外，周永康一案，市場正密切關注能否在3月兩會前公開定調。只要一正式公佈，意味這一輪石油業的整肅可塵埃落定，大家無謂再鬥，以後疊埋心水建設國家。所以朋友說，中石油（857）自上周起不斷反彈，都是有些道理的。
海迪