騰訊（700）斥資31億銀入股內地版OpenRice大眾點評網，連同阿里巴巴入股網上學習平台，一石擊起千重浪，騰訊固然再創新高，連帶手遊、支付相關股份亦炒到飛天，第二波升浪一觸即發，要揀一隻一注獨贏，唐牛首選神州數字（8255）！
點解揀神州數字？好簡單，三個理由。第一，食正尋寶概念。騰訊及阿里巴巴近期收購同業頻率之密，好似師奶去街市買餸咁，幾乎日日有新聞。神州數字2012年推出網遊評論網站「遊戲瓶」，讓玩家為各類遊戲評分，以及交流打機心得，功能同大眾點評網如出一轍，但行業性質同騰訊及阿里巴巴更相似，假以時日被相中，可謂合情合理；如果自己養大，仲有埋分拆概念，潛力無限。第二，行業前景看俏。手遊股博雅（434）預喜，去年純利將錄得可觀增長，而神州數字擁有自家開發「神州付」系統，手遊及網遊玩家可透過手機充值卡為賬號充值，將手機話費及遊戲充值服務互通，加上人行最新公佈數據，去年移動支付交易額喪升3.2倍，神州數字業績肯定靚爆鏡，隨時盈喜。第三，股價調整足夠。神州數字今年初高見4.67元，其後回至2.33元，正正為升浪回調五成水平，見底味濃，噚日一記陽燭，相信只係升浪嘅開端，絕對值得優先跟進。
唐牛