上周講過中央會全力解除大陸最大啲銀行一旦爆煲下對政權嘅威脅。因97年印尼蘇哈圖都因該國最大銀行資不抵債，最後下台。那役後，首有中央狂谷外匯儲備，兼多年唔解放人民幣兌換。我就話中央一定要陰乾最大嘅內銀，因為佢哋已經大到不能救兼長期貪污，令放貸過程嚴重錯配，所以先默許例如騰訊（700）去接存款。咁中央「陰乾內銀」亦有另一方法。
再成國策受惠股
係乜？就係返去改革開放初，國家痛定思痛咁搵我哋啲身經百戰嘅港商，即搵我哋班香港銀行參與內地存款分流兼放貸活動。所以不得不叫大家「不問價追東亞銀行（023）」！打電話畀老炒家，佢話：「今次係八十年代初後，東亞銀行再成國家政策受惠股，估唔到香港人又有利用價值。不過我都係33蚊入，早咗。」
大家知唔知東亞喺內地嘅分行數目同香港差唔多，而至舊年中5,000億元存款，有2,000億元已經係內地。佢哋舊年尾，應該食到應啲財富產品雞飛狗走兼內地銀行唔掂之傳聞吸存款，再跟住剩係掉轉跟上海同業拆息咁借番畀啲內銀已賺大錢。因佢哋以前喺內地貸存比率非常低，所以中央一抽乾水，佢哋就大把錢去借出。
最正係今年初，股價因為啲人話「佢都有賣產品」下，由35蚊跌穿30蚊，仲要啲分析員預測2013年盈利比2012年盈利倒退！嘩！癡線！
咁香港業務點？早幾日星展出業績在港業務好強，東亞將會今日中午出業績，等睇啲分析員俾寶Baby打屎忽吧。
東亞股價已橫行五年，不過盈利、派息不斷加，所以只要盈利唔倒退，股價會由噚日收市30.45元直升至11月高位35元。如果今日中午出嘅業績有盈利增長，即confirm我嘅國策分析，啲大行分析員全部要重新檢討盈利預測兼目標價，到時就會升至超過35蚊，所以今朝買東亞，應係今年最冇壓力、最易贏錢嘅一轉。
孫柏文
獨立股評人
http://facebook.com/shuen
本欄逢周二刊出