環保有「3R」，分別係reduce、reuse、recycle。噚日公佈亮麗業績嘅香港迪士尼，明顯身體力行實踐3R。
Reuse即係重用，迪士尼員工日曬雨淋，捱病屬人之常情。不過菲菲一位喺迪士尼返工嘅朋友爆料，入面所有員工有薪病假數目，由開園時1個月4日，減到現時全年先4日，名副其實「得閒死唔得閒病」。好多員工病咗照返工，令病菌「重用再重用」。
Reduce即係減少使用。園方上個月公佈今年加薪幅度平均約4%，只追貼通脹，花紅普遍0.9個月左右。噚日迪士尼公佈全年賺多逾一倍時，員工們當然火滾。樂園無需花錢激勵員工士氣都激賺，減低成本功力果然了得。
Recycle循環再造。菲菲朋友話，傳聞早排有自由行打尖，員工上前勸阻，卻反被該人狠摑。不過由於樂園係個帶畀人歡樂嘅地方，所以園方冇報警。員工被摑後，硬食之餘仲要笑面迎人，尊嚴賤過泥，思想循環再造。所以話迪士尼真係一個充滿magic嘅地方。
講完環保樂園，順帶都要講吓環保股。呢個板塊炒咗咁耐，海螺創業（586）終於見到起色，全日升6%，突破20蚊。同為半新環保股嘅中滔環保（1363）炒到癲，係時候到海螺創業接力追落後；加埋早前橫行後，街貨應該幾乾，隨時挾升。
Fifi
本欄逢周二、四刊出